नेसं ११४३ कौलागा द्वादशी, कार्तिक २४ गते शुक्रवाः
नेपाः थीथी जातजाति, भाषा, धर्म, साँस्कृतिक सम्पदा व मूर्त अमूर्त कलाकृतिं जायाच्वंगु देय् खः । कलाकृति व सम्पदां जायाच्वंगु देय् धकाः हलिमय् छगू ज्वःमदुगु म्हसिका बियाच्वंगु दु । थ्वहे झ्वलय् नेवाःतय्गु थीथी साँस्कृतिक पक्ष नं छगू खः । नेवाःतय्गु थःगु मौलिक भाषा, लिपि, संस्कृति दु गुगु हलिंन्यंक हे ल्वकंह्वाः । नेवाःतय्गु संस्कृति मध्येय् स्वन्तिं हनीगु म्हपुजा नखः नं छगू खः । थुगु नखलय् विषेश यानाः मन्दः च्वय्गु चलन दु । यलय् थ्वहे मन्दःया छगू कासा क्वचाःगु दु ।
नेवाःतय्गु बिस्कं परम्परात मध्येय् मन्दः च्वय्गु परम्परा नं छगू खः । स्वन्तिबलय् म्हपुजा, किजापुजा याय्बलय् बिशेषरुपं मन्दः च्वय्गु परम्परा दु । थुगु मन्दः च्वय्गुयात ल्यंकातय्गु व मन्दःयात ल्हातं हे कलात्मकरुपं च्वय्गु नापं थुकिया ज्ञान व अध्ययन याकाः न्हू पुस्तायात लःल्हाय्गु आज्जु तयाः नेपालभाषा मंकाः खलः यलया इनापय् स्वन्ति नखः व नेपाल संबत् ११४४ न्हूदँया लसताय् नेवाः (स्यनेकुथि) प्रशिक्षण केन्द्र व बोधिचर्या नेपालया मंकाः ग्वसालय् नेसं ११४३ कौलागा द्वादशी, कार्तिक २४ गते शुक्रवाः यलया मंगलय् च्वंगु आर्दश कन्या निकेतन मा.विइ मन्दः च्वज्या कासा क्वचाःगु दु ।
मुक्कं झिंनिम्हसिनं ब्वति काःगु थुगु कासाय् झी झी पुचः थेच्वया गगन महर्जन न्हाप लाःगु दु । अथेहे न्याधःया प्रशन्ना बज्राचार्य, सुबहाःया सुजिना शाक्य व बौद्ध युवा कमिटीया किपा बज्राचार्य छसिकथं ल्यू, लियांल्यू व हःपाः लाःगु खः । कासाय् सिरपाः त्याकूपिंत यल महानगरपालिकाया उपमेयर एवं कार्यवाहक मेयर मञ्जली शाक्य बज्राचार्यं दसिपौ, सिरपाः व लुमन्तिचिं लःल्हाःगु खः । अथेहे त्याःपिंत नेपालभाषा मंकाः खलः यलया नायः हिराकाजी महर्जनं मंकाः खलःपाखें देछाःगु नगद सिरपाः नं लःल्हाःगु खः । कासाय् लिच्वः पिथना कवलय् (निर्णायक मण्डलय्) विरिष्ठ लिपिविद् एवं अन्वेषक भाजु लोकरत्न शाक्य, कलाकार एवं नेपाल हस्तकला महासंघया नायः प्रचण्ड शाक्य व किरण शाक्यपिं च्वनादीगु खः ।
यलय् ताःई न्ह्यःनिसें दिनाच्वंगु थुगु कासायात हाकनं छक्वः न्ह्याकेगु कुतःकथं नेपालभाषा मंकाः खलः यलया इनापय् नेवाः (स्यनेकुथि) प्रशिक्षण केन्द्र व बोधिचर्या नेपालया मंकाः ग्वसालय् न्ह्याःगु थुगु कासा निब्वय् ब्वथलाः न्ह्याकूगु खः । न्हापांगु ब्वय् प्वताय्चुनं जक च्वय्गु व लिपांगु ब्वय् समाः याय्गु कथं डेढ घण्टाया इलय् कलात्मकरुपं छुं नं थासा व ज्याभः मछ्यःसे कासामिपिंसं मन्दः दय्कूगु खः । कासाय् कासामिपिंसं म्हपुजाया आधारय् दय्कूगु खः ।
अनुप शाक्यं न्ह्याकादीगु थुगु ज्याझ्वलय् विषेश पाहां कथं नेपालभाषा मंकाः खलःया नायः हिराकाजी महर्जन, पाहां कथं यल महानगरपालिकाया २१ वडाया वडाध्यक्ष रबिन्द्र महर्जन, नेवाः देय् दबू यल जिल्ला समितिया नायः रबिन्द्र शाक्य, आर्दश कन्या निकेतन मा.विया प्रधानाध्यापक शैलेश प्रधान, नेपालभाषा मंकाः खलःपाखें कासाकजी राजेन्द्र महर्जन व वरिष्ठ पत्रकार एवं कासाया निंतिं सहजकर्ता भाजु सुनिल महर्जन व नेवाः पत्रकार राष्ट्रिय दबू यल कचाया मञ्जु बज्राचार्यपिनिगु उपस्थिति दुगु खः । ज्याझ्वल् मंकाः खलः यलया नायः लिसें २१ वडाया वडाध्यक्ष रबिन्द्र महर्जन, वरिष्ठ पत्रकार सुनिल महर्जन व लिच्वः पिथना कवःया लोकरत्न शाक्यपिनिसं थःथःगु न्वचु न्ह्यब्वःगु खःसा कलाकार प्रचण्ड शाक्यं कासाया लिच्वः पिथंगु खः ।
मंकाः ग्वसाःखलःपाखें नेवाः (स्यनेकुथि) प्रशिक्षण केन्द्रया हामा भाजु रुबिन शाक्यं लसकुस न्वचु बियादीगु व बोधिचर्या नेपालया नायः भाजु अनिल शाक्यं सुभाय् न्वचु बियादीगु थुगु ज्याझ्वलय् मूपाहां, पाहां, निर्णायक मण्डलया दुजःपिंत लुमन्तिचिं नं लःल्हाःगु खः । थुगु मन्दः च्वज्या कासाया कजी बोधिचर्या नेपालया मुबिन शाक्य जुयादीगु खः ।
थुगु कासां न्हू पुस्ता व युवा वर्ग नापं कलाकारतय्त हःपाः बीगु व झीगु संस्कृतियात म्वाकेगु कुतः जूगु दु । मन्दःया नामं विदेशी संस्कृति व रंगोली दय्कीगु थेंजाःगु चलनयात चीकेगु नापं मन्दया महत्व थ्वीकेगु हे मू आज्जु थुगु कासा काःगु खः । झीगु मौलिक संस्कृतियात झीसं हे नालामकाल धाःसा झी साँस्कृतिक पक्षय् कमजोर ज्वी । उकिं मौलिक संस्कृतियात प्रचार प्रसार यानाः भविष्यतक ल्यकाः न्हू पुस्तायात हस्तान्तरण याय्गु झीगु दायित्व खः धयागु खँयात कासां बःब्यूगु खः ।