नेसं ११४२ चिल्लागा अस्ति, चैत्र ११ गते शुक्रवाः
यल महानगरपालिका १६ वडाया ग्वसालय् व नेवाः स्यनेकुथि (प्रशिक्षण) केन्द्रया व्यवस्थापनय् न्ह्यानाच्वंगु सच्छिन्हुया प्रचलित नेपाललिपि, भुजिंम्वः लिपि, रञ्जना लिपि व आधारभूत नेपालभाषा व्याकरण स्यनेज्या क्वचाःगु दु । नेसं ११४२ चिल्लागा अस्ति, चैत्र ११ गते शुक्रवाःकुन्हु स्यनेकुथिया ज्याकुथिइ छगू ज्याझ्वः यासें स्यनेज्याय् ब्वतिकाःपिं झिंन्हय्म्हेसित मूपाहां यल महानगरपालिका १६ वडाया वडाध्यक्ष भाजु निर्मलरत्न शाक्यपाखें लःल्हानादीगु खः । अथेहे नेवाः स्यनेकुथिया ग्वसालय् जुयाच्वंगु नेपाललिपि स्यनेज्याय् ब्वतिकाःपिं न्हय्म्हेसित नं उगु हे ज्याझ्वलय् वरिष्ठ लिपिविद् भाजु लोकरत्न शाक्यं लःल्हानादीगु खः ।
मय्जु प्रलिशा शाक्यं न्ह्याकादीगु व स्यनेज्या कजी मय्जु पुजिना शाक्यं लसकुस न्वचु बियादीगु थुगु ज्याझ्वलय् लिपिविद् भाजु लोकरत्न शाक्य व मूलिपि स्यनामि भाजु किरण शाक्यपिंसं नेपाललिपिया खँय् जः व्हलाः न्ववानादीगु दुसा मूपाहां १६ वडाया वडाअध्यक्षं थज्याःगु ज्याझ्वः लिपा नं न्ह्याकायंकेगु बचं बियादीगु खः । अथेहे स्थानीय सरकारपाखें प्रचलित नेपाललिपि, भुजिंम्वः लिपि, रञ्जना लिपि व आधारभूत नेपालभाषा स्यनेज्या याःगु थ्वहे न्हापांगु व ऐतिहासिक जूगु धकाः स्यनेकुथिया हामा लिसें लिपि स्यनामि भाजु रुबिन शाक्यं धयादीगु दु ।
वंगु नेसं ११४२ कछलाथ्व पारु, कार्तिक १९ गतेनिसें चिल्लागा सति, चैत्र १० गतेतक न्ह्याःगु थुगु स्यनेज्याय् ब्वति काःपिंसं थःगु हे ल्हातं नेपाललिपिं च्वयातःगु रचनात नं ब्वज्या याःगु खःसा लिपि सय्कूपिंपाखें मय्जु रश्मिरा शाक्य व भाजु बिकल महर्जनं थ:गु अनुभव कंगु ख: । अथेहे थुगु हे ज्याझ्वलय् नेवाः स्यनेकुथि व छ्यलाबुला ज्यासःया कुतलय् नेवा:तय्गु भाय्, लिपि, सामाजिक, आर्थिक, साँस्कृतिक व मेमेगु खँत दुथ्या:गु दबू वेबसाइटया नं पिब्वय्ज्या याःगु खः । थ्वहे झ्वलय् नेवाः स्यनेकुथिया उदिप शाक्ययात छसिकथं नेपाल हस्तकला महासंघया चुनावय् सदस्य पदय् त्या:गु व कृपा बज्राचार्ययात पेज थ्री नेपालभाषा पिपलस् च्वाइस अवार्डय् नोमिनेट जूगुलिं भिंतुना देछाय्गु ज्याझ्व: नं या:गु ख: ।
