नेसं ११४३ ञंलाथ्व अस्ति, असोज ६ गते शनिवा:
नेपाःया थःगु मौलिक नेपाललिपियात म्वाकातय्गु व छ्यलाबुलाय् व्यापकता हय्गु कुतःकथं न्ह्यानाच्वंगु नेपाललिपि स्यनेज्या व नेपालभाषाया आधारभूत व्याकरण स्यनेज्यां बांलाःगु लिच्वः काःगु दु । स्थानीय तहपाखें ऐतिहासिकरुपं स्यनेज्या न्ह्याकूगु थुगु स्यनेज्या युवा वर्ग लक्षित यानाः यल महानगरपालिका १६ वडाया ग्वसाः व नेवाः (स्यनेकुथि) प्रशिक्षण केन्द्रया व्यवस्थापनय् जूगु खः ।
थुगु स्यनेज्या सच्छिन्हुया न्ह्याःगु खः गुकिइ प्रचलित नेपाललिपि, भुजिंम्वः लिपि, रञ्जना लिपि व आधारभूत नेपालभाषा व्याकरण स्यनेज्या जूगु खः । नेसं ११४३ ञंलाथ्व पचि (पञ्चमी), असोज ३ गते बुधवाःकुन्हु स्यनेकुथिया ज्याकुथिइ छगू ज्याझ्वः यासें स्यनेज्याय् ब्वतिकाःपिं झिंच्याम्हेसित मूपाहां यल महानगरपालिका १६ वडाया वडाअध्यक्ष भाजु निर्मलरत्न शाक्यपाखें दसिपाै लःल्हानादीगु खः । ज्याझ्वय् १६ वडाया महिला सदस्य मय्जु बबिता श्रेष्ठजु नं झायादीगु खः ।
स्यनेज्याया कजी मय्जु पुजिना शाक्यं लसकुस न्वचु व प्रलिशा शाक्यं न्ह्याकादीगु लिसें सुभाय् न्वचु बियादीगु थुगु ज्याझ्वलय् लिपि स्यनामि भाजु किरण शाक्यं नेपाललिपिया खँय् जः व्हलाः न्ववानादीगु दुसा मूपाहां १६ वडाया वडाअध्यक्षं थज्याःगु ज्याझ्वः लिपा नं न्ह्याकायंकेगु बचं बियादीगु खः । यल महानगरपालिका १६ वडापाखें प्रचलित नेपाललिपि, भुजिंम्वः लिपि, रञ्जना लिपि व आधारभूत नेपालभाषा स्यनेज्या न्ह्याकूगु थ्व निक्वःगु खुसि खः । स्यनेकुथिया हामा लिसें लिपि स्यनामि भाजु रुबिन शाक्यं लिपि स्यनेज्याया विषय न्वंवानादिसें आः वैगु दिनय् वडापाखें नेवाःभाय् मसःपिंत नं नेवाःभाय् स्यनेगु प्रस्ताव नं तःगु खः । अथेहे नेवाः स्यनेकुथि प्रशिक्षण केन्द्रं थ्वहे वैगु नेसं ११४४ न्हूदँया लसताय् प्रचलित नेपाललिपिया न्हू फन्ट स्यनेकुथिया वेभ साइत मार्फत सार्वजनिक याय्गु नं घोषणा याःगु ख: । गुगु फन्ट डाउनलोड यानाः छ्यलेफैगु जानकारी नं ब्यूगु ख: ।
वंगु नेसं ११४३ बछलागा तिलाः (तृतिया), बैशाख २५ गतेनिसें गुंलागा चःर्हेय्, भाद्र २७ गतेतक न्ह्याःगु थुगु स्यनेज्याय् ब्वति काःपिंसं थःगु हे ल्हातं नेपाललिपिं च्वयातःगु रचनात नं ब्वज्या याःगु खःसा लिपि सय्कूपिंपाखें मय्जु ओशिना शाक्य व भाजु विनोद बज्राचार्य थःगु अनुभव कनादीगु खः ।
नेसं ११४३ नेपाललिपि स्यनेज्या ब्वतिकया प्रचलित नेपाललिपि, भुजिंम्वलिपि व रञ्जनालिपि व नेपालभाषाया आधारभूत व्याकरणया बारे यक्को ज्ञान दुग्यंक सय्केदया जिपिं थौं सकलें तसकं हे लय्ता || यल महानगरपालिका १६ वडा व नेवाः (स्यनेकुथि) प्रशिक्षण केन्द्रयात यक्को यक्को सुभाय् देछाया च्वना || जय मां भाय् || जय नेपा देय् ||
सुभाय् दु ।।