नेसं ११४२ दिल्लाथ्व पुन्हि, असार २९ गते बुधवाः
मस्तय्त परम्परागत कलाया ख्यलय् दुकानावनेगु आज्जुकथं नेवाः (स्यनेकुथि) प्रशिक्षण केन्द्रया ग्वसालय् न्ह्याःगु १५ न्हुया नेपाल परम्परागत कला कार्यशाला ११४२ क्वचाःगु दु । नेसं ११४२ तछलागा चःर्हेय्, असार १३ गते सोमवाःनिसें न्ह्याःगु थुगु कार्यशाला १० दँनिसें १५ दँया मस्तय् निंतिं जूगु खःसा थुगु कार्यशालाय् मुक्कं १९ मस्तय्सं ब्वति काःगु खः । कार्यशालाय् नेपाल परम्परागत कला स्यनेकने, परम्परागत चित्रकला व डिजाइनया अभ्यास नापं अवलोकन याकूगु खः । मस्तय्गु थःगु स्कूलय् थज्या:गु परम्परागत कला स्यनेकने ज्वीमखुगु जुयाः थुगु कार्यशालां मस्तय्त भविष्यय् तःधंगु ग्वाहालि ज्वीगु व थ्वहे थुगु कार्यशालाया मू विशेषता खः । थुगु कार्यशालाय् मस्तय्त इमिगु हे स्तरकथं थ्वीगु परम्परागत कलाया अभ्यास याकूगु खः । गुकिइ मस्तय्सं खंकेफैगु देगलय् च्वंगु साधारण बुटा, साधारण घाँय् बुटा, अलंकार, खनाच्वनीगु द्यःया ज्वँसा, बस्तु, मन्दः नापनापं कलाया साधारण सौद्धान्तिक पक्षत नं स्यनेकने याय्गु ज्या जूगु खः । कार्यशालाय् मस्तय्त आपाः ज्ञान बीगु आज्जुं मस्तय्त शैक्षिक भ्रमण नं यंकूगु खःसा कला सम्बन्धि स्लाइड शो व युवा कलाकार नरेन्द्र मल्लपाखें अभिमुखिकरण ज्याझ्वः नं जूगु खः ।
नेपाल हस्तकला महासंघ (कला तथा शिल्प परिषद्)या ग्वाहालि लिसें छ्यलाबुला ज्यासः व सिद्धार्थ सिल्भरया सहकार्यस जूगु थुगु कला कार्यशालाय् स्यनेकुथिया कलाकजी श्रवण शाक्यं स्यनादीगु खःसा पुजिना शाक्य कार्यशालाया कजी जुयादीगु खः । १५ न्हु तक न्ह्याःगु थुगु कार्यशाला नेसं ११४२ दिल्लाथ्व त्रयोदशीकुन्हु स्यनेकुथिइ छगू ज्याझ्वः यासें क्वचाय्कूगु खः । छ्यलाबुला ज्यासःया कजी मय्जु गंगा बज्राचार्यं न्ह्याकादीगु उगु ज्याझ्वः नेपाल हस्तकला महासंघया नायःभाजु प्रचण्ड शाक्यया मूपाहांसुइ जूगु खः । ज्याझ्वलय् वय्कलं देसंपिनेच्वंपिं प्रोफेशरत नं झीथाय् वयाः झीगु परम्परागत कला सय्केत वयाच्वंगु दुसा थुकिइ मस्तय्गु भविष्य तसकं बांलाः धयादीगु दु । अथेहे स्यनामि भाजु श्रवण शाक्यं थःम्हं कार्यशालाय् मस्तय्त स्यंगुया अनुभव कंसें वय्कलं मस्तय्त स्यनाकथं हे बांलाक ज्या याःगु व थुगु कार्यशाला परम्परागत कलाया महत्व म्हसीकेया निंतिं तयागु खः धकाः धयादीगु दु । ज्याझ्वलय् ब्वतिकाःपिं मस्तय्त दसिपौ लःल्हाय्गु नापं मय्जु सोफिया श्रेष्ठ, मय्जु सास्ता बज्राचार्य व भाजु रुजेन शाक्यपिं स्वम्हेसित कार्यशालाय् उत्कृष्ट जूकथं सिरपाः लःल्हाःगु खः । महासंघया न्वकूपिं व परिषद्या सभापतिलिसें दुजःपिनिगु उपस्थिति दूगु थुगु ज्याझ्वलय् स्यनेकुथिया हामाभाजु रुबिन शाक्यं थुगु १० दँनिसें १५ दँतकया मस्तय्त जूगु नेपाल परम्परागत कला कार्यशाला न्हापां तिनि हे जूगु खँ धयादीगु दु । स्यनेकुथिपाखें नेपाल हस्तकला महासंघयात थः सकल दुजः व हस्तकलाया क्षेत्रय् व्यवसायी यानाच्वंपिनित छ्यलीगु बील, लेटरहेड लिसें दक्व भ्वँतय् नेपाःया हे मौलिक लिपि रञ्जना लिपि छ्यय्केबीगु निंतिं इनाप याःगु खः ।
लसहना व भिंतुना
नेवाः स्यनेकुथि मथां न्ह्यज्यांसुया मंतुना
डा शान्त वीर सिंह तुलाधर
सुभाय ! डा शान्त वीर सिंह तुलाधर |